#وزن #تجليبه
بيده الماي وبچبده العطش يسعر
وهتف يا نفس هوني لجل ابو الاكبر
----------------
رمه الماي وهتف وبمهجته النيران
شلون اشرب وسبط المصطفى عطشان
وصاح المجد بسمه يا گمر عدنان
يا وارث صفات المرتضى حيدر
-----------------
يا بدر المكارم والفخر والزود
يا بحر الوفاء الما تحدّه حدود
ما روّيت چبدك والعذب موجود
تواسي حسين اخوك بهل عطش والحر
--------------
ما روّيت چبدك والعذب بيدك
تدري العطش فتّت مهجة عضيدك
الوفه اوياك انولد عمره بمواليدك
وللإيثار انت الاصل والمصدر
-------------
اذا عودك علي وام البنين امك
واذا حجر الشرف والغانمه ضمّك
حگك يجري حب حسين وي دمك
روحه تآلفت وي روحك امن الذر
---------------
وحگ ذات الحسين ومن صنع سره
لون ربك يمدد للحشر عمره
وما يروي دليله امن العذب گطره
تظل وياه ضامي لساعة المحشر
----------------
ان چان اللي يضحّي للسبط بدماه
وعلى الكوثر رسول الخالق اتلگاه
يروّي چبدته ويطفي لهيب احشاه
وجزاءه بل شهاده الجنّه والكوثر
----------------
انشدك لو گضيت بهل عطش نحبك
وعلى الكوثر يريد المصطفى يشربك
هم تشرب ويروه امن العذب گلبك
وبعده حسين ضامي بولية العسكر
----------------
هم تتروّه من الكوثر بشربه
وبعده حسين ضامي ويلتهب گلبه
لو تنتظر ساعه وينگضي نحبه
وعلى الميعاد يم جده النبي يحضر
------------------
عقيل الكاظمي / بغداد
