قصائد استشهاد الامام الحسن المجتبى عليه السلام
كعدة
محفور بذاكرة العالم اسمك يا مظلوم
انت النوّر شمعة آدم اسمك يا مظلوم
منهاجك يل حسن خالد رغم الزمن
اسمك يا مظلوم
............
رابع اسماء الجلالة الزيِنَت عرش الله واللوح
النوِّرَت خطوات آدم واستقر بيها فلك نوح
للسمه أسرار صارت للأرض أوتاد وصروح
اسمك الثاني للحجج رابع لأبواب الفرج
واللي سِلَك دربك عِرج عن الدنيا لعالم الروح
سر هذا الكون وانواره اسمك يا مظلوم
يقود الافلاك الدواره اسمك يا مظلوم
بيك السر مؤتمن خالد رغم الزمن
اسمك يا مظلوم
------------- 1
نورك البي خلَص آدم واهتده بأقدس تراتيل
من صلب آدم لحوّه روح صار بجسد هابيل
لچن زل خصمه وتهاوه من ترك منهجك قابيل
باسمك ابراهيم افتخر اسماعيل عالشده صُبر
ويوسف على البير انتصر من لگاك بنبض راحيل
يالناصر داوود وموسى اسمك يا مظلوم
يالحافظ إلياس وعيسى اسمك يا مظلوم
وايوب اعلى المحن خالد رغم الزمن
اسمك يا مظلوم
-------------- 2
اسمك اللي كشف ذاك الانحراف بذات إبليس
خلّص من الحوت يونس رفع للجنات إدريس
وگبُل رمشة طرف عين الملَك أحضر عرش بلقيس
الما عرف نهجك ما عرف كلشي وعن الحق انحرف
وجدّك الهادي ما وصف شخصك الا بأجل تقديس
ما عافك دوم اعلى لسانه اسمك يا مظلوم
لكل مؤمن واضح تبيانه اسمك يا مظلوم
بصوت الهادي انعلن خالد رغم الزمن
اسمك يا مظلوم
------------ 3
جدك المختار چان يصيح ويركز البرهان
الحسن وحسين (إنْ قاما وإنْ قَعَدا إمامان)
الحسن مني وآنه منه وِجْعلك توأم القرآن
وتعادله بنفس الثقل واثنينكم من فد أصل
بغيرك ابد ما يعتدل للعدل والخير ميزان
بكل خطبه يعيده ويتكرر اسمك يا مظلوم
راد بهذا الحب يتصدر اسمك يا مظلوم
يل حطّمت الوثن خالد رغم الزمن
اسمك يا مظلوم
----------- 4
هاي ذره من كيانك هاي من جدك براهين
كلها ما قنعت الامة وضيّعَت كل الموازين
لون جدك چان حاضر اينصرك بكل الميادين
سِلمٌ الى من سالمك حرب لكل من خاصمك
قدّسك ، نزّه عالمك يا عطر جنة الرياحين
للمختار انت الريحانه اسمك يا مظلوم
واليطفي جروحه واحزانه اسمك يا مظلوم
بضعة جنة عدن خالد رغم الزمن
اسمك يا مظلوم
----------- 5
ابو الزهره راد اجره يكون ود الامّه وياك
خسرَت اول اختبار وباعتك يالحسن لعداك
بالحرب عافتك وحدك بالصلح كرهت وصاياك
ومن گبُل ما يطلع فجر ونار الخيانه تستعر
ابرجلك نزل خنجر غدر والاثر ما فارگ حشاك
مكتوبه حروفه اعلى الخنجر اسمك يا مظلوم
ثابت عالحگ ما يتغير اسمك يا مظلوم
حاشه يصيبك وهن خالد رغم الزمن
اسمك يا مظلوم
------------- 6
الخنجر المسموم جرحه يهون يم جرح الخيانات
سمّموا چبدك الطاهر من بعد ذيچ العذابات
بالطشت چبدك قذفته وللاجل بانت علامات
ما كفّه بالسم تنچتل جثّتك صابوهه بنبل
حرموك من سيد الرسل وللحقد رفرفت رايات
أم الغي تشوف وتنكر اسمك يا مظلوم
يم جدك ما رادت تذكر اسمك يا مظلوم
وانت بهاي الفتن خالد رغم الزمن
اسمك يا مظلوم
-------------- 7
عقيل الكاظمي
