ميلادين الك يحسين ** عالاسلام شعّت نور
يوم الثالث بشعبان ** ويوم العاشر بعاشور
---------------
يحسين الشعر لو راد * يوصف شخصك ومعناه
يفقد كل معانيّه * گبل ما يوصل لمغزاه
حيث انت الذي ضحّه * اوْفِده دين النبي بدماه
ومولودك فضل عالدين ** والاسلام والدستور
---------------
عرفنه مولدك مولاي * يوم الثالث بشعبان
لاچن أرد اوضح چيف * شهر الكدر والاحزان
عاشور الك بيه مولود * وانت ابْساحة الميدان
ومن ساعة استشهادك ** تجدّد عهد ليك اوْدور
----------------
عندي مستند يثبت * صحّة هالامر وشهود
والبرهان تاريخك * يخبرنه ابْحدث موجود
عن الصحبة اوْبني هاشم * والچفين والعامود
والراية الذي ظلت ** ترفّ اشْما تمرّ ادهور
---------------
اوْعنّ النار والاخطار * والايتام والخدّر
وعن سهم الفجيعة اوْعَن * مصيبة گطعة المنحر
والرمح الحمل راسك * اونوره چالبدر يزهر
اوْشيّاله التفاخر بيه ** اوْبين الناس ظل يدور
------------
گال الموت مات حسين * اوْراسه اعلى الرمح شاهد
لاچن كذب كل ما گال * حسين ابكل گلب خالد
حسين ابكربلة موجود * ذاك اعلى الترب ساجد
يِصَلّي الفرض بالناس ** اويشوفه الگصد ليه ايْزور
---------------
گبه شامخه چالطود * اومناره عالية وزوّار
اوْطيور ابحضرته اترفرف * تحسّ بأمن واستقرار
اوناس تروح ناس اترد * مضيفه ازدحم ليل انهار
اوْذكر اسمه اعلى كل لسان ** بآيات الحمد مذكور
------------
اوْمضاجِع اله ولاصحابه * ولعضيده الگمر عباس
رايات اوترف عالكون * مضايف ما تردّ الناس
صارت كعبه للزوار * او لهل الفخر رفعة راس
لاچن هالمضاجع هاي ** لا هي گبور لا هي قصور
------------
هيّه اصروح شيّدهه الاله * وحاطهه بنوره
وصار الهه مهابه وشان * وبكل گلب معموره
جزاء لصبر ابو اليمة * وتضحيته وعُظُم دوره
حِيَه دين النبي ابْدمّه * اوبنه صرحه وأحاطه بسور
----------------------
من يوم انولد أصبح * حبيب لسيد الكونين
إبهام النبي ثديه * اوْتربّه ابْحِجِر جدّه سنين
راده ذخر من بعده * يحيي بدمه سور الدين
ويصبح مولوده اويه الدين ** بالله مأيّد ومنصور
---------------
هذا مولد المظلوم * ويّه الدين ميلاده
بده ويّاه مولوده * من ساعة استشهاده
مولودك يبو السجاد * لو ننظر بأبعاده
مولود القيم والخير * وصرح الغانمة المعمور
----------------
#عقيل_الكاظمي
