مهما يطـول الزمن *** نصرخ يشبل الحسن
هيهات * هيهـات *** ننسه الضلع * هيهات
-----------------
طر گلبي جمر الحزن * هد عزمي طول النوح
صورة مصاب الضلع * بعيونـي دوم تلوح
هل صـوره ما تنّسي * وعـنّ الفكِر متروح
شما بيّه يبرد جَرح * تسعـر عليّه جروح
وجرحي سحابة غضب *** تـمطر دموع ولهـب
وجمرات * جمرات *** ما تنطفي * الجمرات
-----------------
جمرة ضلع فاطمه * تتلاهب امن زمان
وطول الدهـر ما گـدر * يخمد لظى الأحزان
تتناقـل بكل گلب * موروثه بل وجـدان
لوعتهه ما تـنطفي * ولا تعرف النـسيان
عشناهـا رغـم الدهــر *** وبـِدْمانه خط القـدر
مـأسـاة * مـأساة *** ما ننسه * هل مأساة
----------------
شفـناهـا مو بالنـظـر * صورتهه بالأفكار
شفنه اعلى دار النبي * من هجمـوا الأشرار
شفنه اعلى باب الوحي * يـصعـد لهيب النار
وسمعنه ونّ الطُهـر * من طعـنة البسمار
وصاح الملَك بالسمه *** كـسروا ضلع فاطمه
عبرات * عبرات *** دم تنزف * العبرات
----------------
شفنه الجنين الوگع * مرمي على حجر البين
اوحسرة گلب فاطمه * ودموع ابو الحسنين
لا لا وحگ دمعـته * وحزن الحسن وحسين
مـا ننسه ثار الضلع * مهما تمرّ سنين
باقي بمهجنه الألم *** كل لحظه رمية سهم
وآهـات * آهــات *** تـتـجـدّد * الآهات
-----------------
ويّانه
يبقه الحزن * عايش بلايه حـدود
نحمِل مرار الصبر * مهما جَرِحنه يزود
نصرخ يشبل الحسن * يا حجّة المعبود
نـترجّه ومضة أمل * من فجرك الموعود
يمته يطر الفجر *** ليوم الفرج ننتظر
ما مات * ما مات *** بينه الامل * ما مات
-----------------
ندري بجرح مهجتـك * وبگـلبك المالـوم
لاچن نظل نـنشدك * والدمعه تجري دموم
يل مهدي طال الصبر * يمته الفرج يا يوم
يـا ساعة نجبر كسر * ضلع امّك المهشوم
ضلع امّك يعاتبك *** لـيوم الوعد يندبك
ثارات * ثارات *** لا تترك * الثارات
----------------
عقيل الكاظمي
telegram instagram facebook مدونتي
ttps://www.youtube.com/c/amalkadhmi78/featured)
