قصيدة صبرا يا عراق

----------

بمناسبة استشهاد أكثر من 2000 عراقي بريء على جسر الأئمة في بغداد

صبرا يا عراق الصبر يجلي الهم

صبرا عالجراح التنزف من احشاك = وتخضب جمالك بالدم العندم

صبرا عالسهام البالغدر ترميك = كل يوم بفجيعة ونايبة ومأتم

صبرا عالذئاب الغدت من كل صوب = تنهش بالخيانة بلحمك وتلهم

صبرا عالصبر واعلى المرار البيه = شما گلبك تعب وانصاب وتألم

ومهما كُبر جرحك يا عراق الخير = نداوي جروح گلبك من نزيف الدم

يا تاج وعلى راس العرب مرفوع = يشامه وبيك خدّ الخارطه اموسّم

يا صدر العروبة اليصد عنهه سهام = وكل ساعه ضلع من عنده يتهشم

يبو بغداد إصبر والجروح هواي = وأعجز لو ردت بجروحك اتكلّم

چم ظالم حكم گاعك وچم سفّاح = عليك تسلّط بطغيانه وتحكّم

انّوبه مصيبتك بالرادوا ايقسموك = اويخسه الگال عن هالگاع تتقسّم

يالشرقك يمدّ لغربك الأعراق = وغربك من إباء المشرق استلهم

وشمالك من جنوبك كحّل عيونه = وجنوبك من شمالك روحه تتنسّم

يبو بغداد إصبر والصبر مريود = واحنه اعلى الهموم وياك نتحزّم

وكل ساعه نقدّملك مهج وگلوب = اوعلى الموت بكرامه وشرف ما نندم

وشفت زوّار ابن جعفر نطوا أرواح = ابرغبتهم اختاروا شكل المحتم

مثل ما گضه الكاظم بالسجن مسموم = مهجهم گضت مشتعله بلهيب السم

ومثل ما نعشه ظل فوگ الجسر مطروح = جثثهم عالجسر خلّت ألف معلم

ما طاح الجسر من كثرة الزوار =  من ثگل الحمية البيهم اتهدّم

اشكثر آلام تتحمّل يبو الطيبات = وعْليك المحن من كل كتر تلتم

كلما گمنه من محنه ترد اردود = علينه الشدد تنعاد بأشد واعظم

ضحايه ك اهلنه بسطوة الإرهاب = حراير تنثكل ، أطفال تتيتّم

وصرخات الأرامل تدوي بالأسماع = وعلى كل بيت جوّ الفاجعه خيّم

والإرهابي يعلن فتوه بالتكفير = ابرذالة معدنه اعلى الدين يتهجّم

إنشده يا عراق بهالفعل شيريد = يذبح بالعراقي وثغره يتبسّم

يگول آنه أمير المؤمنين شلون = جبان ومن املاگه الزلم يتهزّم

خل ينزع قناعه ، خل تشوفه الناس = عيب امن ارجال ارجال تتلثّم

الأمير اعلى العراق امن العراق يكون = او تشوف المرجله بوگفاته تتجسّم

أمير اعلى الوطن ميصير ذباحه = شيداوي الجرح لو فاسد المرهم

------------------

الشاعر عقيل الكاظمي 
الشارقه 2005

الشاعر عقيل الكاظمي مع الشاعر الكبير جابر الكاظمي والرادود ضياء الخزرجي