بل غربه عيناك نامت على الهم
والجمره بحشاك وبچبدك السم
أنشد واريد لشيعتك من عندك اجواب
سم الغدر طر مهجتك لو فگد الاحباب؟
--------------
گلبي انفجع لمصيبتك دم هلّت العين * يا شمعة الدين
يا وارث الهم والصبر من جّدك حسين * يا شمعة الدين
أرد انشدك عن الأهل متبعّد سنين * يا شمعة الدين
يل كاظم بدار الغرب دارك صفت وين * يا شمعة الدين
بل غربه تحتار يا لوه الحكمه
ومن عگب الانوار دارك مظلمه
يل ساكن بطاموره ظلمه ابسجن الاذناب
سم الغدر طر مهجتك لو فگد الاحباب
---------------
مغصوب لمن فارگت أهلك والديار * وبمهجتك نار
خليت بعدك سيدي چم گلب محتار * وبمهجتك نار
اوداعك لهل بيتك ترك بل گلب آثار * وبمهجتك نار
ومن فارگتهم ما لفت من عندك اخبار * وبمهجتك نار
يل كاظم شلون تفارگ ديارك
وبدمع العيون ما تطفه نارك
أنشد واخاطب دنيتك بدموع العتاب
سم الغدر طر مهجتك لو فگد الاحباب
-------------
من موطنك لارض الغرب أشخصك هارون * يا علة الكون
وبالسجن گضيت العمر للحزن مرهون * يا علة الكون
أرد انشدك يا نايبه ويا فاجعه تهون * يا علة الكون
فگد الأهل لو غربتك ما بين السجون * يا علة الكون
يا كاظم الغيض عن المظالم
يل معدنك فيض عفه ومكارم
تگضي حياتك بالسجن چا شنهي الاسباب
سم الغدر طر مهجتك لو فگد الاحباب
------------
ابسجن ابن شاهگ ممتحن بين اربع اركان * وبالگلب نيران
وهل أربعه هموم ومآسي ولوعه واشجان * وبالگلب نيران
وهالسجن يل كاظم صبح منزل الأحزان * وبالگلب نيران
ميراث الك من فاطمه بت سيد الاكوان * وبالگلب نيران
ميراثك النوح طبعك طبعهه
وبچبدك جروح كسرة ظلعهه
يل كاظم بضلعك أثر من ذاك الصواب
سم الغدر طر مهجتك لو فگد الاحباب
-------------
أربعه وعشرين انگضت من عمرك اعوام * يا بدر الاسلام
تنتقل من سجن لسجن وبگلبك آلام * يا بدر الاسلام
وتحسب سنين لطلعتك وتعدّ الايام * يا بدر الاسلام
وتاليهه عينك عل هضم بل فاجعه تنام * يا بدر الاسلام
وبجسمك آثار قيود المصيبه
والسم صبح نار بچبدك لهيبه
ليا سبب بدرك سيدي بليل السجن غاب
سم الغدر طر مهجتك لو فگد الاحباب
----------------
ناشدنه وسمعنه الخبر من واقع الحال * يا شمس الآمال
سم چبدك وفگد الأهل وجروح الاغلال * يا شمس الآمال
كل نايبه منهن سهم صوب الدلال * يا شمس الآمال
وكل سهم من عدهن جرح وصوابه چتال * يا شمس الآمال
وكل محب ناداك وصوته تعاله
بدموعه ينعاك يبن الرساله
صاح ودليله امن الحزن لمصيبتك ذاب
سم الغدر طر مهجتك لو فگد الاحباب
--------------
#عقيل_الكاظمي
من ديوان #خواطر_الافكار ص66
telegram instagram facebook مدونتي
ttps://www.youtube.com/c/amalkadhmi78/featured)
