الأربعاء، 23 فبراير 2022

قصائد استشهاد الامام موسى بن جعفر الكاظم عليه السلام / الشاعر عقيل الكاظمي

على الموعد اجيتك  على نعشك لگيتك 

-------------- 

لفه اعلينه البشير بطلعتك بشّر 

يصيح البشرى يا شيعة ابن جعفر 

الإمام الكاظم امن المعتقل يظهر 

مواعد شيعته وكل شيعي خل يحضر 

وانه بلهفه تنيتك  على نعشك لگيتك

--------------- 

واجب كلنه نحضر ساعة الميعاد 

والموعد على جسر الوفه ابغداد

وانه بكل جارحه بيه جمر وگاد

جمر شوگي وحنيني والأمل يزداد 

تجي سالم يريتك  على نعشك لگيتك

---------------

على سنين البعد گلبي صبر واحتار 

ولجل يوم الفرج تترقب الأنظار 

اجيت وشوگي نسّاني الأهل والدار 

ونِثَر جمر الحزن دمعي بلهيب النار 

يَمن بالروح بيتك  على نعشك لگيتك  

---------------- 

وِصَلت وعل جسر شفت الجمع ملتم 

وعلى نعشك يهلّون المدامع دم 

اسمعِت صاح الطبيب وگلبه يتألّم

چبد هذا الغريب اموذّر امن السم 

نعه وصحت ونعيتك  على نعشك لگيتك 

---------------- 

على نعشك هويت وألهج باسمك 

وشفت گيدك والآثار الذي بجسمك 

فجعنه الطاغيه يل كاظم ابسمّك

يريت السم سره ابدمي ولا دمك

ابهلي ونفسي فديتك  على نعشك لگيتك

--------------- 

الأمل چان الأمل اتشرّف بملگاك

واشوفنك واكحّل ناظري بضواك

ما چان الأمل فوگ الجسر ألگاك 

ويم جسمك انوح وانتحب وانعاك 

ابدمع دامي بچيتك ** على نعشك لگيتك

---------------- 

عقيل الكاظمي



telegram    instagram     facebook     مدونتي

ttps://www.youtube.com/c/amalkadhmi78/featured) 


ليست هناك تعليقات:

إرسال تعليق