الشاعر عقيل الكاظمي: قصائد استشهاد الامام موسى بن جعفر الكاظم عليه السلام / الشاعر عقيل الكاظمي

موسى ابن جعفر عالجسر ** گوموا يشيعه انشيله

ونغسّله ونچفّنه ** ودموعنه تغسيله

----------------------

يا شيعه ابهممكم گوموا يا شيعه

للكاظم نأدي اليوم تشييعه

ونجدد عهدنا اوياه والبيعه

ودموم دمعات الحزن ** من الگلب نجريله

ونغسّله ونچفّنه ** ودموعنه تغسيله

-----------------

واجبنه لمُصابه نجري دمعتنه

مثل ما سهرت اعيونه اعلى راحتنه

ونْسمّع اعياله صوت ونّتنه

وتظهر الونه امن الگلب ** ونواسي بيه العيله

ونغسّله ونچفّنه ** ودموعنه تغسيله

-------------------

او مثل ما حِمَل من ثگل الحديد آلام

گوموا انشيل نعشه لچن فوگ الهام

ونْشيعه ابمدامع جرح ما يلتام

وصوت الاحزان ايشيّعه ** ابتكبيره وبتهليله

ونغسّله ونچفّنه ** ودموعنه تغسيله

----------------

خل صوت الاحزان ايشيّعه وينعاه

وگلوب التودّه تندفن ويّاه

ونْواري ابْحسرات اوّنين وآه

ودمع الحزن لمصيبته ** من الگلوب انسيله

ونغسّله ونچفّنه ** ودموعنه تغسيله

---------------

ونْوَدْعه اونهلّ دموعنه لفرگاه

هذا اليوم يوم الحزن ما ننساه

وبگلوب الروافض خالده ذكراه

وجرح المصاب الما طفه ** اصدور الوفه ندميله

ونغسله ونچفّنه ** ودموعنه تغسيله

------------

#عقيل_الكاظمي

الشاعر عقيل الكاظمي