قصيدة استشهاد مولانا امير المؤمنين الامام علي بن ابي طالب عليه السلام
على بابك نهار الفاجعه يحوم ** يحيدر
فجر هل يوم ابد مو مثل كل يوم ** يحيدر
الملايك تنتظر ** واذا طر الفجر
فجر هل يوم ابد مو مثل كل يوم ** يحيدر
**************
يمودّع سواد الليل بآلامك
يل ماخذ ربيع آمال أيتامك
وراك دموعهه والموت جدّامك
اشيظل بهل زمن لو راحت ايامك
تودّع دنيتك وتعانق الموت ** يحيدر
تمشي وتمشي خلفك حسرة الصوت ** يحيدر
ابنحيبه المستمر ** واذا طر الفجر
فجر هل يوم ابد مو مثل كل يوم ** يحيدر
*************
نبره تريد لحدود الوفه تودعك
نبره تريد من آجالك ترجعك
واحد صوتهه وبلهفته ايتبعك
گبل لا خالقك للمنتهى ايرفعك
شُبْگتْ محزمك لهفة البسمار ** يحيدر
لن صاح الإوز يمهاجر الدار ** يحيدر
نأيّس ؟ ننتظر ؟ ** واذا طرّ الفجر
فجر هل يوم ابد مو مثل كل يوم ** يحيدر
***************
اطلعِت يا حيدر امن الدار للمسجد
وسيف الموت عنده بهامتك موعد
حس بيك الفجر رايح بعد مترد
ظل يتوسّلك يالغالي لا تبعد
كل شي بهل وجود اتحسّر اعليك ** يحيدر
حتى الودّعك أصبح يتانيك ** يحيدر
بچت ليلة قدر ** واذا طر الفجر
فجر هل يوم ابد مو مثل كل يوم ** يحيدر
**************
مخنوگة الحياة اعليك تتحسّر
كل شي بهل وجود يصيح يا حيدر
محرابك ينوح لحسر المنبر
يمن حتى الاثير بفگدك تأثّر
محرابك يناطر غدرة اعداك ** يحيدر
ينوح ومنبرك بالحسرة ينعاك ** يحيدر
الاماني تحتضر ** واذا طر الفجر
فجر هل يوم ابد مو مثل كل يوم ** يحيدر
**************
هوى سيف المرادي وانجسم راسك
اختنگ حتى الاثير ابشهگة انفاسك
انت اللي فزت والخسرتك ناسك
وظل ويه اليتامه خالد احساسك
قبّل هامتك من صابك السيف ** يحيدر
وبعيون اليتامه اتبخّر الطيف ** يحيدر
العمر بعدك خطِر ** واذا طر الفجر
فجر هل يوم ابد مو مثل كل يوم ** يحيدر
**************
ألم حزنك فلا خمدت براكينه
وبعدك يا علي زادت مآسينه
أهل الجور باعوا واشتروا بينه
انسِلَب حتى وطنّه ورخص غالينه
ارضنه وصرنه بيهه اليوم اغراب ** يحيدر
وأصبحنه أسارى بولية اجناب ** يحيدر
وحكم اهل الغدر ** واذا طر الفجر
فجر هل يوم ابد مو مثل كل يوم ** يحيدر
***************
#عقيل_الكاظمي
#بغداد #الكاظمية_المقدسة
#قصائد #شعر #شعر_شعبي
#شعر_حسيني #شعراء #ياعلي
ليست هناك تعليقات:
إرسال تعليق