كفّيتي اوّفيتي شمعة ومن طفيتي
آلامچ غفت يمچ على فراش المنية
-------
مِشَه ماي الوفه ابخدّچ جَرِح فوگ الجرِح خضّر
دم آخِر حلم و اوّل حلم سال اعلى فَد منحر
بالاول ، مراكب هاجِرَت بيهه الاجل أَبْحر
وبالآخِر ، يرد منهم خبر ، وبرجعته تأخّر
دمعچ ما نساهم ظل يمشي وراهم
هذا الموت اجه وما حَن بريد الغاضرية
---------
كم مره اعلى عينچ صالت وجالت خيول الطف
تشوفين الكواكب بالمعارك وهيه تتخسّف
عبد الله، على ارمال الغياب بلا نحر يزحف
وجعفر جسمه دامي، وگلبه ضامي، وصدره يتلهّف
تمشين ابخيالچ وحسين اعلى بالچ
قدّمتي كواكب عمرچ لأجله هديه
-------------
عثمان اعتله اغبار الحرب ما بينچ وبينه
وكافل زينب اعلى المشرعه ابنبله انطفت عينه
لمن شفتي سيفه اعلى الترب ينحب على ايمينه
گلبچ ظل يناشد عن حبيب المصطفى وينه
ودخان المخيم بانفاسچ تحكّم
واختنگت مثل بت حيدر وسكنه ورقيه
------------
كل شَيْ من فواجع كربلة بأفكارچ اتجسّم
لاكن طيفچ بمذبح حبيبچ ما گدر يحلم
گلبچ ما تخيّل جسمه بسيوف العده امخذّم
حتى ايظل جماله بلوحه بيضه وخالية من الدم
طوّل انتظارچ بليلچ وبنهارچ
وبسِچة صبر، روحچ صفت ثكله وسبية
---------------
على باب انتظارچ خلصت سنين العمر حسره
ومن راح الامل، جاچ الأجل، وانفجرت العبره
عبراتچ تگلچ للحسين استعجلي السفره
وخجلان الجرح، ما ساوه جرح مصيبة الزهره
چانت امنياتچ كل لحظه ابحياتچ
عباس اويطيح اعلى النهر قربان اخيّه
--------------
عقيل الكاظمي
ليست هناك تعليقات:
إرسال تعليق