#وزن #فائزي 3 دكات
آمر حسين الگوم * وضعونه شدهه
وأم البنين اعليه * وصّت ولدهه
-------------
ضعن المسير اليوم * شدوا رحاله
واعلى الشهاده حسين * حشّم رجاله
وحاطت نجوم الدين * شمس الرساله
شما يأمر تلبيه * ثابت عهدهه
-----------
خاطبهم ولبّـــــو * ابرفع الصوارم
لنه انذهل ما شاف * بدر الهواشم
اصبح يدَور اعليه * بين الأكارم
شاهَد رفيف الواه * ولروحه رَدهه
------------
شاف الگمر عباس * واخوانه يمّه
عن يسرته ويمنا * وجدّامه أمّه
كل واحد توصيه * وصارت تحشمه
وتنادي يا آمال * روحي وسعدهه
-------------
يا فتية الكرار * يل بيكم الزود
منكم بغير حسين * لا واحد يعود
شيبي وتعب ارباي * والمدمع شهود
أمكم لهذا اليوم * انطت وعدهه
--------------
واعَدْت ابو الحسنين * وبذمّتي صار
أذخَركم لهل يوم * لحسين أنصار
گبل السبط تمشون * بل ضعن لو سار
بارواحكم تحمون * للحُرّه حَدهـه
-------------
واعدت ابو الحسنين * وآنه الوفيّه
سالم يردّ حسين * وانتو الضحيّه
ابظلْكم أبد متروح * زينب سبيّه
دمكم ولا تشوفون * دمعه اعلى خدهه
------------
لزينب على الهامات * نصبوا عرشهه
وأجسادكم عالگاع * تصبح فرشهه
ويرويهه راعي الجود * ساعة عطشهه
خيمتهه هوّه يصير * وهْوه عَمَدهه
-----------
راهَنِت دهري بهاي * أصبِر واكابر
وادري بخبركم راح * يرجعلي باچر
وگال الگلب عل آه * أصبر واساهر
بس كون اشوف حسين * سالم بعدهه
------------
يوليدي يا عثمان * لو شفت الاكبر
مثله لأجل هل دين * إرخص المنحر
وانت مثل جسام * ردتك يجعفر
تفگد الشمعه الچان * جاسم فگدهه
---------------
وعبد الله يبني تموت * بل عز أريدك
من گبل طفل حسين * ترخص وريدك
ويا گمر هاك الجود * يا شهم بيدك
بيك الأمل متعوف * زينب وحدهه
------------
ودعوهه بل حسرات * وبدمعة العين
وبجمرة الآهات * ودعهه الحسين
سارت ضعون الدين * بيهه ايحدي البين
واللي أخذهه الموت * ما ظن يردهه
------------
#عقيل_الكاظمي / #بغداد
ليست هناك تعليقات:
إرسال تعليق