يبني يحسين عني لاوين رايح بهذا السفر
روحي ويّاك گلبي يرجاك وانتظر منك خبر
-----------
يا من غبت عن عيناي * ولا عن روحي تتغيّب
شما تبعد تظل بحشاي * ومن حبل الوريد اقرب
چنت بدر التشع بسماي * الغِيابك گلبي ما حسّب
ويوم الغبت عن دنياي * صرت لطلوعك اترقب
اتنه الطلوع وجفني ينبوع ودمعي لفراگك نهر
أنظر سماك وگلبي يرجاك وانتظر منك خبر
------------
غِبِت يحسين عن دارك * عِفِتهه موحشه بعدك
عنهه غابت انوارك * اوحزينه ظلت لفگدك
صرت اتفگَّد آثارك * ابدارك يبني افتقدك
وأرد واتنطّر اخبارك * ولا رد خبر من عندك
گلبي محتار يلهب بنار خوفي من جور الدهر
اوغَدِر دنياك وگلبي يرجاك وانتظر منك خبر
------------
چنت شمعه وتضوي الدار * وعيني مساهرة تباريك
عليك اتوجّل وأحتار * لوَن نسمة هوة تمر بيك
يبني والدهر غدّار * واخاف امن الزمان عليك
بِعَثت اربع شباب اقمار * لوَن خان الدهر تفديك
أربع بدور توهب نحور إلَك ساعات الخطر
تحفظ دماك وگلبي يرجاك وانتظر منك خبر
--------------
الوجودك قدّمت شبّان * ابچفهم يفخر الصارم
وصحت يا ثمرة الوجدان * أخوكم عالسفر عازم
يا عبد الله يا عثمان * يَجَعفر يا گمر هاشم
ردت منكم يَهل شجعان * يردّ حسين الي سالم
اوقدّم عهود صاحب الجود اوّگف عباس الگمر
يحمل لواك وگلبي يرجاك وانتظر منك خبر
--------------
مشوا وياك لاچن وين * منكم ما لفتني علوم
وين بهل ضعن ناوين * اوعليه طير المنيه يحوم
صِرِت اتنطّرك يحسين * يا ساعة ترد يا يوم
ودمعي ما نشف والعين * ما لحظه يمرهه النوم
احسب ايام والگلب هام وما ظهر منك أثر
بصوته ناداك وگلبي يرجاك وانتظر منك خبر
------------
دَمْعي لفرگتك مسفوح * ابد ما ينشف المدمع
وجفني اعلى الدرب مشبوح * لا يُغمَض ولا يِهجع
الك اولادي خلهه تروح * فداك تنام بالمصرع
يل وياك اخذت الروح * رِدِت سالم الي ترجع
روحي تفديك يبني تحميك وتشگف سهام القدر
روحي ترعاك وگلبي يرجاك وانتظر منك خبر
------------
#عقيل_الكاظمي / #الشارقة
ليست هناك تعليقات:
إرسال تعليق