يا ليلي فارگوني ** للحسرة ودعوني
راحو بنيني الأربعة ** للحسرة ودعوني
------------
كل تعب عمري ورباي وزهرة أيامي
سافرو يا ليلي وآنه اسودَّت ايّامي
ودعوني اوّدعتهم والدمع هامي
راحت اوياهم فرحتي وظلت آلامي
وتگطعَت فروعي ** وتناثرت دموعي
بس حسرتي متجمعة ** للحسرة ودعوني
-----------
مو شباب اربع مواسم فارِگت دهري
وضاعت ايامي وتنازل للعدم عمري
غرّبت شمسي وتساقط كل ورق صبري
ولا مطر يروي ربيعي من ذبل زهري
يومي اختلف ضياءه ** وليلي اختلف مساءه
ساعاته آهات ودُعة ** للحسرة ودعوني
--------------
بوحشتك يا ليلي ظلت ساهره عيني
انحب ويطرب سكونك لو عله ونيني
شانتظر من ضيم دهري وشيراويني
وبعد ما ظن كل خبر منهم يوافيني
طول علي سفرهم ** صرت انتظر خبرهم
جفني ولا جف مدمعة ** للحسرة ودعوني
------------
چان معمور بضواهم بيتي ظل خالي
راحوا وظلت صورهم عايشه ابالي
دمعي بالآه اتصل وانگطعت آمالي
لمّن تباعدوا عني گربت آجالي
آنه الچنت وطنهم ** صارت عگب ضعنهم
روحي غريبة وضايعة ** للحسرة ودعوني
-------------
بلا نَجِم أنظر سماءك روحي محتارة
بس اشوف اربع كواكب بيهه دوارة
خل تغيب نجوم عمري وتطفه أنوارة
بس ترد شمس الحسين ويرجع نهارة
متبرعة ابدماهم ** لجلة نذرت ضواهم
وعيني تراقب مطلعة ** للحسرة ودعوني
------------
كل فرد منهم شهم للشدة ربيته
فارس لعرس الشهادة بيدي زفيته
دمهم رخصته ولبو السجاد ضحيته
بس ردت سالم يعود حسين يا ريته
وصوت الحزن سمعته ** وحبل الأمل گطعته
وحس الگلب بالفاجعة ** للحسرة ودعوني
-----------
عقيل الكاظمي/ بغداد
