قصيدة وجدانية للمولى امير المؤمنين عليه السلام

صوت الوفه ابوجداني  **  حبك جره ابشرياني 

والوالد ايربّيني  **  والوالده اتغذيني  

حبك جره ابشرياني 

--------------

يا بالحسن چلمة احبك ما ضن

تكفي اوسِهام العشگ بيه ما ضن 

چم عاشگ الذاب ابغرامك وانجن

وآنه الذي بهْواك گلبي اتمحّن 

تاخذني نسمة حبك  **  وتردني واصحة بدربك 

وروحي الذي تدليني  **  والوالده اتغذيني  

حبك جره ابشرياني 

----------------  

عشت ابغرامك يا علي وما اهتم

مهما اقاسي بحبك وأتألم 

ولو صابني امن الدهر أحزان وغم

أنخاك وبإسمك يحيدر أسلم 

إسمك ابطرف لساني  **  وتعلم صدق ايماني 

عاشگ انه وتدريني  **  والوالده  اتغذيني  

حبك جره ابشرياني 

--------------- 

يا عشگ ما بين الجوانح محسوس 

بل شده تحضر عندي هل شي ملموس 

ما يوم شفتك بالشدايد مايوس

تحضر وضيّك ساطع ايغطي شموس  

هذي عقيده بذاتي  **  ومو واهم  ابچلماتي 

هذا اللي شفته بعيني  **  والوالده اتغذيني  

حبك جره ابشرياني 

----------------- 

بعيوني شفتك تحضر بأي صوره

اجنود الك كل واحد ينفّذ دوره  

جنودك يصيرون لمحبك سوره 

ويحموه من هم الزمان وجوره

وهذا الجره ويايه  **  بجور وهظم دنيايه 

بكل معضلة تنجيني  **  والوالده اتغذيني  

حبك جره ابشرياني 

------------------ 

يا من گلت للي صنع انوارك

يا رب عِبَدتك عارف باسرارك 

لا لجل جنتك لا مخافة نارك

وآنه اقسم بانوارك وآثارك 

بحبك تراني امتيّم  **  چي لنّه يجري اويه الدم 

هذا العشگ  يحييني  **  والوالده  اتغذيني  

حبك جره ابشرياني 

----------------- 

أي وحگ اسمك يبو حسين وسرك 

اي  وحگ مكنون العلوم بصدرك 

حبيتك آنه وأمري طايع أمرك 

اويكفيني بس عني رضاك وعذرك 

أحظى برضاك الغالي  **  وعذرك لسوء أعمالي 

وهذا الامر يكفيني  **  والوالده  اتغذيني  

حبك جره ابشرياني 

----------------- 

عبدك أنه وانت الذي مالكني 

امشاركني روحي وبالهوه مشاركني  

وأصرخ  باسمك  يا علي أدركني 

ابوحشة ظلام اللحد لا تتركني

وبيك الامل يا حيدر  **  بالبرزخ وبالمحشر 

ومن كوثرك ترويني  **  والوالده  اتغذيني  

حبك جره ابشرياني 

------------------- 

#عقيل_الكاظمي

قصائد استشهاد الامام علي عليه السلام - قصيدة في شجاعة امير المؤمنين

معركـة خيـبـر

-------------

التاريـخ ينقـل اخبار ** للعالم ويبديهه

وهذا خبر عن الباب ** وعن معجزة داحيهه

---------------

من حرب خيبر الك اروي الاخبار

لمّن وصل جيش الرسول المختار

للحصن راد ايحرره امن الـكفار

للامه رادلهه الخير ** ومن الكفر يهديهه

----------------

فرسان خصص من جموع الايمان

ونصّب الأول قائد اعلى الفرسان

راح لحرب خيبر لچن رد خسران

فرسانه صارت تهجيه ** وهوه الذي يهجيهه

-----------------

ونصّب الثاني انّوبه بعد الاول

ويدري الرسول بطلعته ويتأمّل

وفكرك لعد هذا الأمر لو حلل

تلگه القياده متلوگ ** الا لعـد راعيهه

-----------------

وراعيهه حماي الحمه وحامي الجار

ومن شاف سيد الرسل هـذا اللي صار

صاح انطي باچر رايتي للكرار

ما تحلّه الا بيمناه ** ولغيره ما انطيهه

----------------

الكرار صار الجيش ينشد عنّه

ما يعرفونه وكل فرد يتمنه

هـوّه الذي مكتوبه ليه الجنّه

وحامي الحمه بهذا الحال ** عينه الرمد ماذيهه

----------------

وصاح الرسول ايريد حمّاي الدين

جاه الوصي الكرار عود الحسنين

وبلمسه من چف النبوه اعلى العين

بلمسه من چف المختار ** لعين الوصي يشفيهه

-----------------

ورايته اتسلمهه الوصي بچفه وصاح

الله  أكبر والنصـر ويّا لاح

وبفتح باب الحصن چفه المفتاح

معجزه لسان التاريخ ** النه بفخر يرويهه

---------------

اتلگاه مرحب للحصن لمن طب

صاح آنه مرحب بالقتال مجرّب

ليوث الحرايب منّي ما تتگرّب

ومني تهاب الابطال ** حيث آنه المربيهه

----------------

شتگول يا مرحب شتحچي شتگول

هذا علي سيف الاله المسلول

عن چلمتك يا مرحب انت المسؤول

وهاك اخذ رد الكرار ** لچلمتك يل حاچيهه

-----------------

عود الحسن من سمع چلمة مرحب

ناده هله بسوح الحرايب مرحب

للحرب عندي صدر واسع مرحب

وبچفي وبسيف الدين ** نار الكفر اطفيهه

-----------------

نار الكفر اطفيهه لاچن بالدم

واشعلهه الكم لچن ريتك تعلم

هل نار الكم تستعر بجهنّم

واليزرع الشر بإيد ** نيران يحصد بيهه

-----------------

آنه الذي  سمّتني امّي  حيدر

وغذتني أمي بلبن طاهر حيدر

دور الي بسوح الحرب لاچن حيدر

حياه سيد الاكوان ** بإيحاء من باريهه

-----------------

وسل سيفه حيدر لچن لمّن سلّه

بيه چتل مرحب واخذ ثاره بچتله

ونال النصر بيده وبيه اتجله

وحقق نصر هذا الدين ** بيمينه وبماضيهه

----------------

والمعجزه الاُخره الجرت ويه الباب

خلاهه عل خندق جسر للاصحاب

وبيده سندهه وحيّر اهل الالباب

شلون الجسر چف وباب ** يعبر الجيش اعليهه

-----------------

وتمّ  النصر بل معركه للاسلام

بامر الله وبزود ابو الحمله الضرغام

وتخلّدت معجزه بطول الايّام

مفخره لكل الاجيال ** والدهر ما ناسيهه

----------------

الشاعر عقيل الكاظمي /  بـغــداد/  1998

قصيدة يا علي فراكك صعب للشاعر عقيل الكاظمي

صرخه مـن جرح الگلب ** يا عـلـي فـراگك صـعـب
صوّبَتنه مصيبتك ** يا حامي الجار
--------------
صرخه ودمع يا بالحسن * وجمرة هـضم تتوجّر
ارواح بعدك يا علي * لمصيبتك تتحسّر
بكل الگلوب المؤمنه * حبك سكن يا حيدر
وكـل گلب لمصابك يظل * ينزف دمه للمحشر
فگدت اوياك الـصـبر ** وراحـت احلام العمر
شوف لوعة عيلتك ** يا حامي الجار
----------- 1
وچـم عين يا حامي الحِمه * لجلك تِهِل دمعتهه
هل محنه مو بس عيلتك * متلوّعه بشدّتهه
كل الارامل يا علي * لفگدك تظل حسرتهه
وكل المـساكين اصبحت * متحيّره بلوعتهه
چنت للناس الامل ** وغيّبك سهم الأجل
وظل حلمهه بصورتك ** يا حامي الجار
------------ 2
وايتامك الچانت تحت * ظلّك يظل الرّحمه
الكل منهم اصبح يا علي * يرعاه نوحه وهمّه
ما چان بوجودك فرِد * منهم يحسّ بيتمه
لاچن بفگدك سيّدي * اتيتّمت كل الامّه
اوعُگب عينك الزمن ** ذبهه باحضان المِحن
وهذي حالة شيعتك ** يا حامي الجار
-------------- 3
بهل حاله ظلّت امتك * وحال الملايك أصعب
تواسي النبي أعلى مصيبتك * ولجلك يحيدر تنحب
ونيران سم چبد النبي * هل يوم گامت تلهب
وبسيف ابن مُلجم صُبَح * ضلع الوديعه امـصوّب
مصـابك بگلب الشرع ** جدّد مصاب الضلع
وظل يعيش بحسرتك ** يا حامي الجار
-------------- 4
أهل الأرض واهل السّمه * عاشوا بهاي اللوعه
وحتّى الطبيعه اتأثرت * بمصيبتك مصدوعه
حتى المطر حتى الهوه * لجلك يهل دموعه
وروح الحياة اتغيّرت * يا بالحسن مفجوعه
والليالي اتكدّرت ** والايّام اتحسّرت
من غِبِت عن دنيتك ** يا حامي الجار
-------------- 5
يا بالحسن هذا الجره * الكون انفجع لمصابك
ودين الله ناح لفرگتك * وظل ممتحن بغيابك
وظلّت صـلاتك حايره * تنتظرك ابمحرابك
ومشتاگ يلثَم جبهتك * يا بو تراب اترابك
يا علي وصاب الدهر** سهم احزان وكِدَر
وظل ينوح لفرگتك ** يا حامي الجار
-------------- 6
عقيل الكاظمي / الشارقة

ديوان خواطر الافكار في مدح ورثاء آل البيت الاطهار للشاعر عقيل الكاظمي

ديوان خواطر الافكار في مدح ورثاء آل البيت الاطهار عليهم السلام الجزء الاول للشاعر عقيل الكاظمي
على هذا الرابط


https://drive.google.com/open?id=1xT1h7hEuY1Z8jqoDgdP7UVMNJVgN_EpX

قصائد استشهاد السيدة الزهراء عليها السلام

يـوم الوعد ننتظره ** وما ننسه ضلع الزهره
مهما تمر الايّام ** ما ننسه ضلع الزهـره
---------------
عندك خبر يبن الحسن * بمصيبة الزهره شصار
هجموا على الدار العِده * اوما رعـوا حُرمه لهل دار
وباب النبوّه وجّـروا * يبن الحسن بيهه النار
وبدفعة الباب انكسر * ضِلع الطهر بالبسمار

ضـلع البتول اتهشّم ** وسور الديانه تهدّم
ونصرخ يحامي الاسلام ** ما ننسه ضلع الزهره
----------------
عندك خبر يبن الحسن * عــن ما جِرَه ومحّنهه
غصبوا فدك حـق الارث * والارث ضايع مِنهه
وكسروا ضلعهه وطيّحوا * يبن الحسن محسنهه
بضعة الهادي تروّعـت * ولا واحد يأمّنهـه

ولو ناشدت عـن حيـدر ** فارس حُنين وخيبر
يجاوب گلبنه المنضام ** ما ننسه ضلع الزهره
---------------
حيدر امـير الملحمه * بيوم الحروب الخَطْره
أصبح اسير اهل الغدر * وللباري سلّم امره
وسيفه الحفظ بنت النبي * ورْعـاهـا يوم الهجره
هل يوم فارگ ساعده * وسْفه وغِدَر بيه دهره

امّنوا من بركانه ** وبيه حوطوا عدوانه
وشاهدنه فعل الظلام ** ما ننسه ضلع الزهره
---------------
يا حيف حماي الحِمه * البيه الامل والرّجوه
اتگيد بمحمل صارمه * بلا ناصـر ولا اخوه
الچانت تغسّل سيفه * من دم العِده بكل غـزوه
هل يوم صارت تِندبه * وما يرد الهه النخوه

ما فگد حيدر عزمه ** لاچن سكوته لحكمه
من أجل حفظ الاحكام ** ما نـنسه ضلع الزهـره
-----------------
فارس بدر فارس احد * وخيبـر ويـوم الاحزاب
واللي چتل عمرو بن ود * واللي قِلع ذيچ الباب
حاشـاه تِضعـف همّته * وتسيطر اعليه اذياب
لاچن الگيـّد حيـدره * بين النبي وبينه كتاب

مـا ضِعَف عنهم زوده ** ساكت لحفظ عهوده
وصاحت دموع الصمصام ** ما ننسه ضلع الزهـره
------------------
واحنه نناديك ولهب * جمر الهضم يتوگّد
امّك الزهره فـاجده * لساعـد حماهــا الاوحد
ولو چان جدّك حيدر * بحبل الوصيّه اتگيد
ما أظن عهدك سيّدي * بنفس الوصيّة تحدّد

وتدري بضلعهه وكسره ** ما غيرك انت يجبره
لا وحگ ذيچ الالام ** ما ننسه ضلع الزهـره
---------------
انهض يشبل العسكري * وجدّد ملاحِم حيدر
ضلع امك اصبح يندِبك * يمته يغايب تظهر
اربعطعش قرن انگضت * واعلى الضلع نتحسّر
ومن أجل جبرة كسرته * ضلوع الظلم تتكسّر

ضلوع التعدّه اعليهه ** واللي تشمّت بيه
ونهتف بوجه الاجرام ** ما ننسه ضلع الزهره
-----------------
عقيل الكاظمي

حديث الامام الباقر عليه السلام عن المختار الثقفي رضوان الله عليه

روي‌ أنّه دخل جماعة على أبي جعفر الباقر (عليه السّلام) و فيهم عبد اللّه بن شريك، قال: فقعدت بين يديه إذ دخل عليه شيخ من أهل الكوفة، فتناول يده ليقبّلها، فمنعه، ثم قال: من أنت؟

قال: أنا أبو الحكم‌ بن المختار بن أبي عبيد الثقفيّ، وكان متباعدا منه (ع) فمدّ يده (ع) فأدناه حتّى كاد يُقعده في حجره بعد منعه يده.

فقال: أصلحك الله، إنّ الناس قد أكثروا في أبي القول، و القول‌ والله قولك.

قال: وأيّ شي‌ء يقولون؟

قال: يقولون: كذّاب، ولا تأمرني بشي‌ء إلّا قبلته.

فقال: سبحان الله! أخبرني أبي أنّ مهر امّي ممّا بعث به المختار إليه، أَ وَ لَمْ يبنِ دورَنا، و قتلَ قاتلَنا، و طلب بثأرنا؟ فرحم الله أباك و كرّرها ثلاثا- ما ترك لنا حقّا عندَ أحدٍ إلّا طلبه‌

المصدر / كتاب ذوب النضار للشيخ جعفر بن نما الحلي

ج1 ص 62

حديث الامام الباقر عليه السلام عن المختار الثقفي رضوان الله عليه

روي عن أبي جعفر الباقر (عليه السّلام) أنّه قال‌: لا تسبّوا المختار، فإنّه قتل قتلتنا، و طلب ثأرنا، و زوّج أراملنا، و قسّم فينا المال على العسرة 

من كتاب ذوب النضار في شرح الثار للشيخ جعفر بن نما الحلي رحمه الله ج1 ص62