قصيدة لاستشهاد الامام الصادق عليه السلام .. رواية الدمع

رواية الدمع

----------

احاديث الحزن يرويهه دمع العين = واليرويه الك صوت الدمع صادق

لان من  المشاعر تنبع الدمعات = وهيه الخلت لسان الدمع ناطق

الدمع صامت ابذاته ولفظه مو چلمات = أحاسيس اوصور للفاهم الحاذِق

فُضَح سر المصيبة البيّه چان يلوج = وأسرار المصيبه اتزلزل الشاهق

رِسَم صورة جرح نابض بگلبي سنين = ويصرخ يا مصيبة جعفر الصادق

يا جعفر الصادق إنت إنت الدين = وانت في سماء المعرفه شارق

قَسَم بالتين والزيتون وبياسين = قَسَم بالواقعة والطور والطارق

الحگ صوته اختفه ولولاك دينك مات = وباسمك باقي نبضه لهل وكت خافق

الحگ وياك عاش وانت عشت اوياه = اوخصمك مع الباطل مندحر زاهق

على كرسي الحكم لاهث فتح عيناه = يريد يكون هوه الاول السابق

خَذَت عقله القصور وغرته الاموال = مثل ما يحمل اثقال الذهب ناهق

فِتَح سوق الضمائر بابخس الاثمان = اوتحت عرشه ارتمه كل كاذب ومارق

بسم الله فتحوا جامعة إبليس = وبثّوا بين هل عالم فكر غاسق

بَحَر من الدجل روجه انحدر طوفان = وانت ابسيف حكمه لهل بحر فالق

هُمّه ايلوّثون افكار هاي الناس = وانت ابچلمه منك تصنع الفارق

يا رحمة إله الكون للأجيال = واليتّبع نهجك بالركب لاحق

ابسبب هاي الفضائل شانئك عاداك = اوصِنَع من حِقده سمّ وسمّك الفاسق

-----------------

عقيل الكاظمي

24/شوال/1432

2011  

قصيدة لاستشهاد الامام علي عليه السلام .. سودت صحيفة أعمالي

سودتُ صحيفةَ أعمالي ** ووكَلْتُ الأمرَ إلى حيدرْ

هو كهفي من نُوَبِ الدنيا ** وشفيعي في يومِ المحشرْ

---------

تمّت لي بولاية حيدر النعمه * وشِفِت بمحبته خير ونِعم جمّـه

سوّدت الصحيفه بذنبي وبجرمه * وفوّضت الامور لصاحب العصمه

كهفي بدنيتي ويوم الفزع رحمه * شفيعي وبالحشر استنجد بإسمه

هل يمنَعُني وهو الساقي ** أنْ أشربَ من حوضِ الكوثر

أمْ يطرُدُني عن مائـدة ** وُضِعَتْ للقانِعِ والمعـتَـرْ

--------

حاشا عن الكوثر للمحب يمنع * ما يمنعني وهـو للكرم منبع

بَدِر حبه بحياتي صار اله مطلع * كهفي بدنيتي ويوم الحشر مَفزع

العباده بغير حبه تضر ما تنفع * يا من تنكر آيات الوصي إسمع

إنْ كُنتَ لجَهلِكَ بالآيام ** جَحَدْتَ مَقام َأبي شُبَّرْ

فاسألْ بدراً وأسالْ أُحُداً ** وَسَلِ الأحزابَ وسَلْ  خيبـرْ

----------

يالناكر فضل حامي الحمه حيدر * مسؤول اعلى حبه بساعة المحشر

سل بـدر وأُحد والخندق  وخيبر * تخبرك منهو لابطـال الحرب دمّـر

هتَف گلبي ابوداده وبالفضل كرر * يمن ليك النبي اعلى اهل الشرف أمّر

قاسُوكَ أبا حسنٍ بِسِواك ** وَهَلْ بالطَّودِ يُقاسُ الذَّرْ

أنّى ساوَوْكَ بِمَنْ ناوَوْكَ ** وَهَلْ ساوَوا نعلي قنبَـرْ

----------

منو مثلك الهادي تباهه باوصافـه * ومنو غيرك صعد وارتقى اعلى اچتافه

وقدّم سيفك الهادي على اسيافه * وتأيَّد بيك نصره وحـقَّـقْ اهدافـه

ما ينفـع المُرجِفْ بيك إرجافه * من حيث الإله اغـمرك بالطـافـه

أفعالُ الخَير ِاذا انتشرت ** في الناس ِفأنْتَ لها مَصدَرْ

وَإذا ذُكِـرَ المعروفُ فمـا ** لِسِواكَ  بهِ شيءٌ يُذْكَـْر

----------

وبسيفك لدين المصطفى احييته * وشچـم فـارس البالحرب ارديتـه

وخيبر تشهد وباب الذي ادحيته * ابعزم چفّك حصنهه العالي هدّيته

لون عزمك هو اعلى الكون أفنيته * هضم حقّك عجيبه شلون عانيته

لَو لَمْ تؤمَرْ بالصَّبْرِ وكظْمِ ** الغَيضِ وَلَيْتَـكَ لَمْ تؤمَـْر

ما نال الأمْرَ أخـو تَيْمٍ ** وَتَنَاوَلَهُ عنْهُ  حَبْتَـرْ

--------

لو ما بالوصيّه اتچتفت يمناك * مـا عنّ الخلافـه شانئك أقصاك

لجل دينك يحيدر طلكت دنياك * الحفظ هالدين ما لحظه غفت عيناك

أوصافك يحيدر لا زِمَتْ ذِكراك * وأفعـالك حُجَجْ ألْزَمِتْ بيهه اعـداك

أفعـالُكَ مـا كانت فيها ** إلاّ ذكرى لِمَنِ اذَّكَّـر

آياتُ جلالـِكَ لا تُحصى ** وصِفاتُ كَمالِـكَ لا تُحصَرْ

--------

آياتك عظيمه اوّاضِحَه البرهـان * حُجَج يا بالحسن صارت على الأكوان

شما رادت تنكّـل باسمك العـدوان * ذلَّتْ وانت شامخ يا لـوه الإيمان

ما بين الخلايق شانك اعظم شان * مـا ينحصـر معناك بقلم ولسان

مَنْ طَوَّلَ فيكَ مدائِحَهُ ** عن أدْنى واجِبها  قَصَّـرْ

فاقْبلْ يا كَعْبةَ آمالي ** مِنْ هَدْي مَديحِيَ ما استَيْسَرْ

--------

الفصيح / السيد رضا الهندي

الشعبي / عقيل الكاظمي  

قصايد استشهاد الامام علي عليه السلام للشاعر عقيل الكاظمي .. مصابك يا علي

مصابك يا علي بالگلب ماذيني

صوبني بسهم گطّع شراييني

------------

نفد بمصيبتك يا بالحسن صبري

وغدت عبرة ألم تتكسّر بصدري

شفت صورة حزن مرّت على فكري

دم لمصيبتك أجرت دمع عيني

-----------

شفت الحسن شبلك روحه ملهوفه

يمشي بديرتك ودموعه مذروفه

اويشاهد عگب عينك موحشه الكوفه

اوينادي سهم فگدك بويه ماذيني

----------

ونظر مسكين حاير گاعد گباله

يونّ اوينتحب ودموعه همّاله

وگصد ليه الحسن ينشد على حاله

شعندك من خبر يا شيخ حاچيني

-----------

والمسكين جاوب والدمع دم هل

أنه مسكين ولكل عاطي أتأمّل

لچن عندي شخص وعليه اريد أسأل

چان يزورني وكل يوم يلفيني

----------

يجيني من بُعُد كل يوم يگصدني

يجي ويزورني ودوم ايتفقّدني

يواسيني وعلى حالي يناشدني

ويطعمني اويداويني ويسلّيني

-------------

شعجب غايب ثلثتيام ما جاني

وهوّ الچان لو واعدني وافاني

ليش بحالتي محتار خلاني

شنهو الحال ما بين الوفي وبيني

----------------

الحسن صبّر عبرته وحبس دمعاته

وظل ينشد عن اوصاف الوفي اوذاته

يا شيخ ارد اسالك عن علاماته

وعن اسمه وصفاته ما تدلّيني

-------------

گال اهوه الذي اعلى اهل المكارم تاج

وچفه البحر لمّن يكرم المحتاج

اوّجهه بالليالي چالبدر وهّاج

بنوره لو حضرني چان يغشيني

--------------

الحسن يدري ابوه الابو لكل مسكين

فجّر عبرته وفيّض دموع العين

وصاح التنشد اعليه ضمه حجر البين

او عليه للموت حزني ايكدّر سنيني

------------

يبو الحسنين هذا الصار من بعدك

هذا اعليك ينشد ذاك يفتقدك

وانه لهاليوم وبگلبي ألم فگدك

اودمع عيناي لمصابك يواسيني

-------------

عقيل الكاظمي / الشارقة

لطميات استشهاد الامام علي بن ابي طالب عليه السلام للشاعر عقيل الكاظمي

ينوح البيت لجلك يا وليد البيت
اويلبي مثل ما ضحيت اله ولبّيت
------------
ينوح البيت لجلك والدمع من دم
يتجاره وأصل مجراه من زمزم
عگب عينك الدين انصاب وتيتّم
حَدِر ضلعه الكسير النار بيه شبّيت
------------
ينوح البيت لجلك وانت تدري شبيه
وشگ البالجدار انت اتعرف ماضيه
اَثَر جرح الذي اعلى مصيبتك ماذيه
جرح من الأزل للحشر بيه خليت
-------------
ينوح البيت ومصابك غده امصابه
اوسواد الحجر انت اتعرف اسبابه
گبل مولدك چان ابيض لچن صابه
الحزن لجلك وعانه گبل ما عانيت
--------------
ينوح البيت يا من للفخر نبراس
ولوما مولدك بيه ما تحجه الناس
يا معدن كرامه وتضحيه واحساس
يل ضحيت لجله ونعم ما ضحيت
--------------
ينوح البيت والله جعل بيه الحَج
اوغدت تگصد الوادم ليه من كل فَج
كرامه ليك وبميلادك اتّـــوّج
اوعلى البيت ابمقامك سيدي اتعاليت
--------------
ينوح البيت واعليه فرگتك متهون
يمن گلبي ابهوه حبك صبح مرهون
ثقل حبك يحيدر ما يحمله الكون
عجب گلبي حواه وبيه انه اتربيت
--------------
ينوح البيت وبنوحه قسم بسمك
رجل ما تمس گاعه غير رجل امك
وطفل ما يضم غيرك عگب ما ضمك
حبيب ابلا بديل لكل محب ظليت
---------------
ينوح البيت والنوح بامر ربه
المصابك سيدي بدمع الحزن لبّه
يضمك لحد وانت مشرف الكعبه ؟
يريت ابدالك الكون اندفن يا ريت
--------------
عقيل الكاظمي

telegram  instagram   facebook 

قصيدة وجدانية للمولى امير المؤمنين عليه السلام

صوت الوفه ابوجداني  **  حبك جره ابشرياني 

والوالد ايربّيني  **  والوالده اتغذيني  

حبك جره ابشرياني 

--------------

يا بالحسن چلمة احبك ما ضن

تكفي اوسِهام العشگ بيه ما ضن 

چم عاشگ الذاب ابغرامك وانجن

وآنه الذي بهْواك گلبي اتمحّن 

تاخذني نسمة حبك  **  وتردني واصحة بدربك 

وروحي الذي تدليني  **  والوالده اتغذيني  

حبك جره ابشرياني 

----------------  

عشت ابغرامك يا علي وما اهتم

مهما اقاسي بحبك وأتألم 

ولو صابني امن الدهر أحزان وغم

أنخاك وبإسمك يحيدر أسلم 

إسمك ابطرف لساني  **  وتعلم صدق ايماني 

عاشگ انه وتدريني  **  والوالده  اتغذيني  

حبك جره ابشرياني 

--------------- 

يا عشگ ما بين الجوانح محسوس 

بل شده تحضر عندي هل شي ملموس 

ما يوم شفتك بالشدايد مايوس

تحضر وضيّك ساطع ايغطي شموس  

هذي عقيده بذاتي  **  ومو واهم  ابچلماتي 

هذا اللي شفته بعيني  **  والوالده اتغذيني  

حبك جره ابشرياني 

----------------- 

بعيوني شفتك تحضر بأي صوره

اجنود الك كل واحد ينفّذ دوره  

جنودك يصيرون لمحبك سوره 

ويحموه من هم الزمان وجوره

وهذا الجره ويايه  **  بجور وهظم دنيايه 

بكل معضلة تنجيني  **  والوالده اتغذيني  

حبك جره ابشرياني 

------------------ 

يا من گلت للي صنع انوارك

يا رب عِبَدتك عارف باسرارك 

لا لجل جنتك لا مخافة نارك

وآنه اقسم بانوارك وآثارك 

بحبك تراني امتيّم  **  چي لنّه يجري اويه الدم 

هذا العشگ  يحييني  **  والوالده  اتغذيني  

حبك جره ابشرياني 

----------------- 

أي وحگ اسمك يبو حسين وسرك 

اي  وحگ مكنون العلوم بصدرك 

حبيتك آنه وأمري طايع أمرك 

اويكفيني بس عني رضاك وعذرك 

أحظى برضاك الغالي  **  وعذرك لسوء أعمالي 

وهذا الامر يكفيني  **  والوالده  اتغذيني  

حبك جره ابشرياني 

----------------- 

عبدك أنه وانت الذي مالكني 

امشاركني روحي وبالهوه مشاركني  

وأصرخ  باسمك  يا علي أدركني 

ابوحشة ظلام اللحد لا تتركني

وبيك الامل يا حيدر  **  بالبرزخ وبالمحشر 

ومن كوثرك ترويني  **  والوالده  اتغذيني  

حبك جره ابشرياني 

------------------- 

#عقيل_الكاظمي

قصائد استشهاد الامام علي عليه السلام - قصيدة في شجاعة امير المؤمنين

معركـة خيـبـر

-------------

التاريـخ ينقـل اخبار ** للعالم ويبديهه

وهذا خبر عن الباب ** وعن معجزة داحيهه

---------------

من حرب خيبر الك اروي الاخبار

لمّن وصل جيش الرسول المختار

للحصن راد ايحرره امن الـكفار

للامه رادلهه الخير ** ومن الكفر يهديهه

----------------

فرسان خصص من جموع الايمان

ونصّب الأول قائد اعلى الفرسان

راح لحرب خيبر لچن رد خسران

فرسانه صارت تهجيه ** وهوه الذي يهجيهه

-----------------

ونصّب الثاني انّوبه بعد الاول

ويدري الرسول بطلعته ويتأمّل

وفكرك لعد هذا الأمر لو حلل

تلگه القياده متلوگ ** الا لعـد راعيهه

-----------------

وراعيهه حماي الحمه وحامي الجار

ومن شاف سيد الرسل هـذا اللي صار

صاح انطي باچر رايتي للكرار

ما تحلّه الا بيمناه ** ولغيره ما انطيهه

----------------

الكرار صار الجيش ينشد عنّه

ما يعرفونه وكل فرد يتمنه

هـوّه الذي مكتوبه ليه الجنّه

وحامي الحمه بهذا الحال ** عينه الرمد ماذيهه

----------------

وصاح الرسول ايريد حمّاي الدين

جاه الوصي الكرار عود الحسنين

وبلمسه من چف النبوه اعلى العين

بلمسه من چف المختار ** لعين الوصي يشفيهه

-----------------

ورايته اتسلمهه الوصي بچفه وصاح

الله  أكبر والنصـر ويّا لاح

وبفتح باب الحصن چفه المفتاح

معجزه لسان التاريخ ** النه بفخر يرويهه

---------------

اتلگاه مرحب للحصن لمن طب

صاح آنه مرحب بالقتال مجرّب

ليوث الحرايب منّي ما تتگرّب

ومني تهاب الابطال ** حيث آنه المربيهه

----------------

شتگول يا مرحب شتحچي شتگول

هذا علي سيف الاله المسلول

عن چلمتك يا مرحب انت المسؤول

وهاك اخذ رد الكرار ** لچلمتك يل حاچيهه

-----------------

عود الحسن من سمع چلمة مرحب

ناده هله بسوح الحرايب مرحب

للحرب عندي صدر واسع مرحب

وبچفي وبسيف الدين ** نار الكفر اطفيهه

-----------------

نار الكفر اطفيهه لاچن بالدم

واشعلهه الكم لچن ريتك تعلم

هل نار الكم تستعر بجهنّم

واليزرع الشر بإيد ** نيران يحصد بيهه

-----------------

آنه الذي  سمّتني امّي  حيدر

وغذتني أمي بلبن طاهر حيدر

دور الي بسوح الحرب لاچن حيدر

حياه سيد الاكوان ** بإيحاء من باريهه

-----------------

وسل سيفه حيدر لچن لمّن سلّه

بيه چتل مرحب واخذ ثاره بچتله

ونال النصر بيده وبيه اتجله

وحقق نصر هذا الدين ** بيمينه وبماضيهه

----------------

والمعجزه الاُخره الجرت ويه الباب

خلاهه عل خندق جسر للاصحاب

وبيده سندهه وحيّر اهل الالباب

شلون الجسر چف وباب ** يعبر الجيش اعليهه

-----------------

وتمّ  النصر بل معركه للاسلام

بامر الله وبزود ابو الحمله الضرغام

وتخلّدت معجزه بطول الايّام

مفخره لكل الاجيال ** والدهر ما ناسيهه

----------------

الشاعر عقيل الكاظمي /  بـغــداد/  1998

قصيدة يا علي فراكك صعب للشاعر عقيل الكاظمي

صرخه مـن جرح الگلب ** يا عـلـي فـراگك صـعـب
صوّبَتنه مصيبتك ** يا حامي الجار
--------------
صرخه ودمع يا بالحسن * وجمرة هـضم تتوجّر
ارواح بعدك يا علي * لمصيبتك تتحسّر
بكل الگلوب المؤمنه * حبك سكن يا حيدر
وكـل گلب لمصابك يظل * ينزف دمه للمحشر
فگدت اوياك الـصـبر ** وراحـت احلام العمر
شوف لوعة عيلتك ** يا حامي الجار
----------- 1
وچـم عين يا حامي الحِمه * لجلك تِهِل دمعتهه
هل محنه مو بس عيلتك * متلوّعه بشدّتهه
كل الارامل يا علي * لفگدك تظل حسرتهه
وكل المـساكين اصبحت * متحيّره بلوعتهه
چنت للناس الامل ** وغيّبك سهم الأجل
وظل حلمهه بصورتك ** يا حامي الجار
------------ 2
وايتامك الچانت تحت * ظلّك يظل الرّحمه
الكل منهم اصبح يا علي * يرعاه نوحه وهمّه
ما چان بوجودك فرِد * منهم يحسّ بيتمه
لاچن بفگدك سيّدي * اتيتّمت كل الامّه
اوعُگب عينك الزمن ** ذبهه باحضان المِحن
وهذي حالة شيعتك ** يا حامي الجار
-------------- 3
بهل حاله ظلّت امتك * وحال الملايك أصعب
تواسي النبي أعلى مصيبتك * ولجلك يحيدر تنحب
ونيران سم چبد النبي * هل يوم گامت تلهب
وبسيف ابن مُلجم صُبَح * ضلع الوديعه امـصوّب
مصـابك بگلب الشرع ** جدّد مصاب الضلع
وظل يعيش بحسرتك ** يا حامي الجار
-------------- 4
أهل الأرض واهل السّمه * عاشوا بهاي اللوعه
وحتّى الطبيعه اتأثرت * بمصيبتك مصدوعه
حتى المطر حتى الهوه * لجلك يهل دموعه
وروح الحياة اتغيّرت * يا بالحسن مفجوعه
والليالي اتكدّرت ** والايّام اتحسّرت
من غِبِت عن دنيتك ** يا حامي الجار
-------------- 5
يا بالحسن هذا الجره * الكون انفجع لمصابك
ودين الله ناح لفرگتك * وظل ممتحن بغيابك
وظلّت صـلاتك حايره * تنتظرك ابمحرابك
ومشتاگ يلثَم جبهتك * يا بو تراب اترابك
يا علي وصاب الدهر** سهم احزان وكِدَر
وظل ينوح لفرگتك ** يا حامي الجار
-------------- 6
عقيل الكاظمي / الشارقة