قصائد استشهاد مولاتنا فاطمة الزهراء عليها السلام / الشاعر عقيل الكاظمي

 

سجل البسمار * عالضلع تذكار

لحيدر حنه ضلوعه * وظلت من ادموعه

عالضلع تذكار

------------

اجه بحقده وظلامه وجاهليته تفور

عُبَر كل الحدود لحد ملاذ النور

البسمار وطلع من عنصره مذعور

لمن شاف طوفان الضوه المهدور

تتصاعد النار * بمنزل الكرار

والزهره مفزوعه * وظلت من ادموعه

عالضلع تذكار

------------ 1

غفه البسمار فوگ الضلع المهشّم

والمحسن غفت عينه اعلى نار ودم

ابگلب حيدر على الزهره الحزن غيّم

صفه بموسم لهيب اجروحه يمطر هم

آلامه أمطار * وجروحه انهار

بجفونه مجموعه * وظلت من ادموعه

عالضلع تذكار

-------- 2

عاشت فاطمه الزهره بضلع مكسور

وحيدر عاش ويّاهه ابصدر مجمور

اذا صاحت ، ابچفه ذولفقاره ايثور

واذا ناحت ، تمر بي لهبه من عاشور

بروحه الجرح صار * خيمه بوسط نار

واختنگت شموعه * وظلت من ادموعه

عالضلع تذكار

-------- 3

بنه بيت الحزن الهه ابّگايه الحيل

حتى اتهل مدامعهه ابنهار وليل

تودع الشمس وتبات اويه نجم اسهيل

اويواسيها علي وعبراته شبه السيل

دمعاته احبار * وجروحه اسفار

للحزن موسوعه * وظلت من ادموعه

عالضلع تذكار

--------- 4

نشف منهه الدمع ساعة نزاع الروح

مثل موت النده بزهرة عمر مذبوح

دفنهه بليل ، شاف العالم بلا روح

رجع وبگلبه أيوب المآسي ونوح

اومن ليل الافكار * ما يطلع انهار

ساعاته مفجوعه * وظلت من ادموعه

عالضلع تذكار

--------- 5

الچان بنظره من عينه يشلّ احروب

الچان بعدله يقلع للمظالم بوب

عليه صار الحزن طول العمر مكتوب

مكسور الگلب بس ماتمه منصوب

وبسمع الاقدار * بغياب الانوار

آهاته مرفوعه * وظلت من ادموعه

عالضلع تذكار

------ 6

عقيل الكاظمي

telegram    instagram     facebook     مدونتي

ttps://www.youtube.com/c/amalkadhmi78/featured)

قصائد استشهاد مولاتنا فاطمة الزهراء عليها السلام / الشاعر عقيل الكاظمي

 بكل روح ** جرح البسمار

هيهات ** ننسه اللي صار

يبقه الجرح بينه ** يجدد مآسينه

------------

الك يبن الحسن دمعتنه نهديهه

اخذهه وحلل بأسباب جاريهه

وبالتحليل يظهر سيدي بيهه

صور آلام ما نگدر نداويهه

أيام ** مرّت واعوام

ويزداد ** جمر الآلام

ومصابه ماذينه ** يجدد مآسينه

------------

صورة جيش جمّع قوّته اعلى الدار

وصورة باب مستعره بلهيب النار

وضِلع مدمي وجنين وحايط وبسمار

وصوت ونين امك بضعة المختار

وتگييد ** حمّاي الجار

ما بين ** گوم الاشـرار

والمدمع بعينه ** يجدد مآسينه

--------------

مو هينه نشوف الليث داحي الباب

على الزهره ايتحسّر والدمع سچاب

ما يدري يخمّد لهب نار الباب

لو يوگف يجابه غَدرة الأصحاب

ويدرون ** طـاها اشوصـاه

مچتوف ** اخـذوه اعـداه

والچتّف ايمينه ** يجدد مآسينه

-------------

كَسِر ضلع البتول اول نوايبنه

وبدَت من يومه تتفرع مصايبنه

الظلم اصبح يطاردنه ويحاربنه

وما عدنه امل غيرك يغايبنه

كل يوم ** لوعه واحـزان

ونشـوف ** جور العدوان

وصار اليعادينه ** يجدّد مآسينه

--------------

اللعين البيده ضلع الطاهره اتهشم

احفاده علينه اليوم تتهجّم

حقدهُم چم صرح للمعتقد هدّم

اويذبحونه ابثغَر شمّات يتبسّم

ونصيح ** يبن الاطهار

يا يوم ** تنهض للثار

الباطل طغه اعلينه ** يجدد مآسينه

--------------

يمته اعلى الارض يومك يطر فجره

وبصوتك تصيح وتجذب الحسره

يا ثارات ضلع الطاهره الزهره

والصوّب ضلعهه ينهشم صدره

والله ** نقسم والله

هل ثار ** لا ما ننسـاه

شما طالت سنينه ** يجدّد مآسينه

--------------

عقيل الكاظمي

telegram    instagram     facebook     مدونتي

ttps://www.youtube.com/c/amalkadhmi78/featured)

قصائد استشهاد مولاتنا فاطمة الزهراء عليها السلام / الشاعر عقيل الكاظمي

ما تنشف اعلى امصيبتچ دمعاتي

وللموت ما يخمد لهب جمراتي

-------------

يا بضعة الهادي وحرم حامي الجار

وام الشمس وام الگمر والانوار

يا صورة ابداع العزيز الجبار

يا آية الحق يا خُزانة أسرار

معجزة وصفچ حيرت چلماتي

--------------

بسيرة حياتچ تظهر اعظم آيات

لا زُبُر لا انجيل لا من توراة

انتي الحديث القدسي من اقدس ذات

انتي السماء لسائر المخلوقات

يا سر وجودي ويا سبب منجاتي

-------------

يا سر وجودي والوجود الأول

يا ساطعة بليل الضلالة الأليل

يا ناصعه ابذكر الكتاب المنزل

يا لامعه ابّرج الكمال الأكمل

يا من بإسمچ سبّحت حسراتي

--------------

يا كوثر الحكمة ومعاني الفرقان

هجمت على بيتچ يزهره العدوان

واللي كسر ضلعچ بجور وطغيان

گاصد يمزگ آيه من القران

قرآني انتي وسيرتچ آياتي

-------------

قرآني إنتي وانتي قاف القدره

يا رحمة الخالق ونوره وسره

هامان دهرچ روّعچ يل زهره

بكسرة ضلع والله يصعب جبره

ومن يوم مأساتچ بدت مأساتي

--------------

بسمار ضلعچ بيه تصوّب صدري

ومصيبتچ هدّت ثوابت صبري

وهموم دهرچ بيهه ضايع دهري

ما يخمد بسيل المدامع جمري

تستعر ناره شما تهل عبراتي

-------------

عقيل الكاظي 

telegram    instagram     facebook     مدونتي

ttps://www.youtube.com/c/amalkadhmi78/featured)

قصائد استشهاد مولاتنا الزهراء عليها السلام / الشاعر عقيل الكاظمي

يا زهرةَ الحقِ والهدى * بضلعكِ الدينُ شُيِّدا

واللهُ يشهدْ * كم فيكِ مجَّدْ * قَولُ محمدْ (ص وآله)

يا زهراء

----------- 

سيرة الزهره عظيمه وحاويه لأقسى التجارب 

منهج ايمان وجهاد بساحة اخطار ومصاعب 

بيهه صفحة مجد كتبت بالفضائل والمناقب 

بجانب ايثار وبطولة  اوصبر عل آلام جانب 

القلبُ منها درعاً غدا * والضلعُ سيفٌ على العِدا

قلبٌ يدافعْ * للظلمِ رادِعْ * والضلعُ قاطِعْ 

للأعداء

----------- 

جانب الايثار عدهه بالذكر واضح بيانه 

بهل أته وآيات كثره الباري يذكرهه بلسانه 

والبطوله والجهاد البيه ثبت ركن الديانه 

بموقف الخطبه تجلّه وللظلم هدت كيانه 

قد أرعَبتْ قلبَ خصمِها * والصدقُ مقرونُ بسمِها

الظلمُ يَبلى * والدينُ أعلى * والحقُ أولى 

بالعلياء

------------- 

وجانب اليعرض صبرهه وما تعانيه من محنهه 

يظهِر اقوال الرسول المصطفى المختار عنهه 

فاطمة بضعة مني وآنه يا هل ناس منهه 

أفرح لفرحة گلبهه واحزن بساعة حزنهه

هذا كلامٌ للمصطفى * وكلُّ من عادى او جفا

أبدى أذاها* اضحى أساها * في قلب طه

والأحشاء 

------------ 

هذا قول الهادي عنهه وخل نشوف اشصار بعده 

انقلبت الامة وعليهه اترادفت شده اعلى شده 

ابتدوا من غصب الخلافه من الوصي وخالفوا عهده

العاهدوا سيد البرية شهروا الاسياف ضده 

قد جرّدوا السيفَ والقنا * وهدّموا كلَّ ما بَنى 

الدينُ يُهدَمْ * والبابُ يُضرَمْ * والضلعُ يُهشَمْ 

جُرحُ سماء

---------- 

فدك نكروها وارثهه انغصب والموقف فجعهه 

هدموا الدين وتوجّب تفتدي الدين بضلعهه

حرگوا الباب وضلعهه انكسر وتغير وضعهه

وسگط محسن بين ايديهه وغسّلت جسمه بدمعهه

الضلعُ منها تهشَّما * والدمعُ حُزناً يَجري دما 

ضِلعٌ تكسَّرْ * دمعٌ تفجَّرْ * قلبٌ تأثَّرْ 

بالأرزاء 

----------- 

منعوا الزهره تنوح وتجذب الونه الخفيه 

واشتكوا رادوا عزلهه ابدار احزان ورزيه

ظلموا وجاروا وچنهم علموا بسر الوصيه

الوصه سيد الكون بيهه وگيّدت حامي الحميه

لولا مواثيقُ المرتضى * ضاقَ عليهِم رَحبُ الفَضا

لكنْ سيظهَرْ * من ولدِ حيدرْ * للحقِ يثأرْ 

سيفُ إباء 

-------------- 

عقيل الكاظمي

telegram    instagram     facebook     مدونتي

ttps://www.youtube.com/c/amalkadhmi78/featured)

قصائد استشهاد السيدة الزهراء عليها السلام / الشاعر عقيل الكاظمي

 

لامة علي وبتاره ودرعه

ناحت على مصابچ يل بضعه

كسر الضلع ميهون ** وكل ذره من هالكون

ناحت على مصابچ يالبضعه

----------------

يوم الهجمو اعلى الدار * جيش ابليس واعوانه

وصوّب ضلعچ الطاغي * اوتماده بجور طغيانه

الوصيّه گيّدت چـفّ * الوصي وسيطرت عدوانه

الوجود تزلزل لحالچ * اوتصاعـد نوح وجدانه

الكون انفجع وتعاله ونينه

ولمصيبتچ دم هلت عينه

شما بالحياة عيون ** وكل ذره من هالكون

ناحت على مصابچ يالبضعه

--------------

كسروا ضلعـج  وفجعوا * دليلچ زمرة الاشرار

وضاع الثار يل زهره * اوتگيّد حيدر الكرار

وما بين النحيب اللي * ظهر من زحمة الاكدار

سِمَعنه لامته التنحب * ودرعه وحسرة البتار

الكل منهم ايحسّ بآلامه

اويذكر علي وزوده وايّامه

أصبح أسير شلون ** وكل ذره من هالكون

ناحت على مصابچ يالبضعه

---------------

لامة حـيـدر الـكرار * ذكرت عزمه بالميدان

ايتوشّح بيهه لو أغضب * بالحومه على العدوان

أسد يوم النزال تهاب * مـن عزمه الانس والجان

عجيبه الگوم ما هابت * سطوة فارس الفرسان

عزم الوصي الكرار وصيته

هل ليله متگيّد بوصيته

وأهل الغدر يدرون ** وكل ذره من هالكون

ناحت على مصابچ يالبضعه

----------------

وسيفه ذوالـفـقـار الچان * بساحات الاجل معروف

لمّن يبرگ ابچفه * يصب على الحتوف حتوف

ينوح اعليچ يل زهره * وينحب والدمع مذروف

يبات بغمده والظالم * اعلى دارچ يهجم بلا خـوف

ضلعچ كسير وضايع ثاره

وحيدر اسير وظل  بتاره

بسجن الحزن مرهون ** وكل ذره من هالكون

ناحت على مصابچ يالبضعه

----------------

ودرعه الچان للهادي * يصد عنّه جيوش اعداه

ويْلوذ ابحماه الدين * ومامون  الدخل بحماه

عليچ انتحب لمّن شاف * تعثر دمعتچ بالآه

عنّچ ما مِنَع غـدر * الزمان  ومحنته وبلواه

صبّ الدهر جوره واحزانه

وللهم صُبَح گلبچ ميدانه

وظل بالالم مشحون ** وكل ذره من هالكون

ناحت على مصابچ يالبضعه

----------------

تركتي دنيتچ واحنه * صُفت النه مصيبتنه

وحيدر ودّعچ لحدچ * اودفن ويّاچ فرحتنه

اوصرنه ويه الحسن وحسين * نجري اعليچ دمعتنه

ومن لوعة گلب زينب * أبد ما طفت لوعتنه

ويبقه الحزن يجري اويه دمانه

وثارچ يظل عايش ويّانه

وما غمضت النه جفون ** وكل ذره من هالكون

ناحت على مصابچ يالبضعه

----------------

عقيل الكاظمي 2007

من ديوان خواطر الافكار ج1 ص 46

telegram    instagram     facebook     مدونتي

ttps://www.youtube.com/c/amalkadhmi78/featured)

قصائد استشهاد سيدة نساء العالمين مولاتنا فاطمة الزهراء عليها السلام / الشاعر عقيل الكاظمي

كعده

أيُ خطبٍ هشَّمَ الصدرَ الحزينْ * فعلى ما يَرتمي رأسُ الحسينْ

الچان يروي حسين من حبه وحنانه * لو يصيبه بغدر بسمار الخيانه

فعلى ما يرتمي رأسُ الحسينْ

---------- 

آه يا نار الاحزان البل گلب ظلت مسعره 

وذوبت احشاي بلهبهه وتركت ابكل گلب جمره 

وغدت تتصاعد بصدري بلوعته وصارت تصهره 

بالضلع آلامي زادت من ضلع فاطمه الزهره

يا غائراً صدرَ الطَّهورِ أما ترى 

قد عادَ قلبُ الدينِ ينزفُ أبْحُرا

والوحيُ يُخفِقُ قادِمَيهِ مُعفَّرا 

قُلْ للمغيَّبِ تَحتَ أطباقِ الثَرى 

إنْ كنتَ تسمعُ صرختي ونِدائِيا 

قد هوى العرشُ على مَهوى الضلوعْ * وغدا الكونُ دماءً ودموعْ 

كسِر ضلعِ الطاهرة صوَّب كيانه  * لو يصيبه بغدر بسمار الخيانه 

فعلى ما يرتمي رأس الحسين

------------ 

الكون من دم يهل دمعه وروحه غابت عن وعيهه 

بيوم جار اعلى الوديعه الطاغي وتجاسر عليهه 

بل غدر صوّب ضلعهه وطاح محسن بين اديهه 

وحسّـت بقسوة دهرهه من عگب فرگة وليهه 

غابَ الامينُ فكُلُّ عَبدٍ أنكَدِ

يَنهى ويأمُرُ ما يَشاءُ ويَعتدي 

وحشا البتولِ بلهفةٍ وتردُدِ

قد كنتُ ذاتَ حِمًى بظِلِ مُحمدِ 

لا أخشَى مِن ضَيمٍ وكانَ حِمًى لِيا 

أيُّها السالبُ للطُهرِ حِمى * قد تركتَ الارضَ من دونِ سَمَا 

افجعِت گلب الطُهُر يا سالب أمانه *  لو يصيبه بغدر بسمار الخيانه 

فعلى ما يرتمي رأسُ الحسين

---------- 

غاب سيد الرسل واضحت تعاني آلام الرزية

جمر نار افراگ ابوهه ولوعته وجور الرعية 

تنظر لحملات حيدر امچتفه بگيد الوصية 

والهه من كثر المصايب لاحت ارسوم المنية

شنَّتْ على تلك الحزينةِ شنَّها

زُمَرُ الضَلالِ فلم يُراعوا سِنَّها

تُومي شَجاً والدمعُ خيَّبَ ظنَّها

صُبَّتْ عَليَّ مَصائبٌ لو أنَّها 

صُبَّتْ على الأيامِ صِرنَ لياليا

حمَلَتْ من دهرِها ما لا يُطاقْ * وسَقاها كأسُهُ مُرَّ المَذاقْ 

والتهب دلالهه بجمرة احزانه *  لو يصيبه بغدر بسمار الخيانه 

فعلى ما يرتمي رأسُ الحسين

------------- 

والتهب گلب الوديعة ومن مرار الصبر عانت 

عاشت ابدار الاحزان وهل الاحزان عليهه بانت 

ذايبه بنار المصيبه فگدت البحماه چانت 

وحين حضرتهه المنيه والاجل ساعاته حانت 

ناحَ الحَمامُ بحَيرةٍ وتوجُسِ

ولهُ الكَمائمُ في رؤىً وتفرُسِ 

بِلِسانِ فاطمةٍ لكلِ الأنفسِ 

فلأجعلنَّ الحزنَ بعدَكَ مُؤنسِي 

ولأجعلنَّ الدمعَ فيكَ وِشاحِيا 

بعدَ ذاكَ الهمِّ والحزنِ الطويلْ * شدَّتْ الزهراءُ للموتِ الرحيلْ

ارتاح گلب البضعه من لوعة زمانه *  لو يصيبه بغدر بسمار الخيانه 

فعلى ما يرتمي رأسُ الحسين

------------- 

الفصيح للشاعر #زهير_الكاظمي

الشعبي للشاعر #عقيل_الكاظمي / بغداد

telegram    instagram     facebook     مدونتي

ttps://www.youtube.com/c/amalkadhmi78/featured)

قصائد استشهاد مولاتنا الزهراء عليها السلام / الشاعر عقيل الكاظمي

#وزن موشح

لوعة فاطمة

----------

ما مصاب ايفجـر انهار الدمع

مثل لوعة فاطمه وكسر الضلع

-----------------

ما مصاب ايفجّر المدمع سيول

مثل لوعة بضعة الهادي الرسول

كِسَر ضلع المصطفى مصاب البتول

وامسه گلب الدين دامي ومنفجع

-----------------

ألف واربعميـت عـام اعلى المصاب

والدمع يهمل مثل ماي السحاب

وأبد مـا طفه الزمن جمرة الباب

ولا جُبَر ضلع الوديعه المنصدع

----------------

ظلت لهل يوم ناره المضرمة

تـشب وسط ضلوعنه المتهشّمه

شحال من شاف الضلع حامي الحمه

ضـاگت الوسعه على صدره الوسع

----------------

حين شاهَد كَسِر ضلع ام الحسن

حِنـه ضلـوعه وزادت عليه المحن

وانحنت ويّاه أضلاع الزمن

اوصوت ونّه اويه الزمن ظل ينسمع

----------------

يون ولهل يوم نسمع ونّته

لوِّعَت الگلوب جمرة لوعته

بضعة المختار بضعة مهجته

شلون يدفن بضعته وبدره اليشع

----------------

انخسف بدره الزّاهر بليل الثره

وعُگب ما تمّم دَفِنهه حيدره

گعد يم الگبُر والمدمع جره

اوظل ينوح بصوت بل هم يرتفع

---------------

راح اظل للموت من بعدچ عليل

صار الي بفگد النبي وفگدچ دليل

آه يـا زهراء ميدوم الخليل

بفرگتچ  طفوا من ايامي الشمع

---------------

هذا صوت الوصي وشهگة حسرته

طفّوا شموع السعادة ابدنيته

سهم فگد ام الحسن طر چبدته

اوّتِر گلبه امن الحزن أصبح شفع

--------------

واحنه ويّه المرتضى بنوح وصبر

نندب الغايب علـى هـذا الامر

يا خذ بثار الاسلام من الكفر

او يحصد بسيفه الظلم أصل وفرع

--------------

عقيل الكاظمي / الشارقة

من ديوان خواطر الافكار ج1 ص 124

telegram    instagram     facebook     مدونتي

ttps://www.youtube.com/c/amalkadhmi78/featured)